عاشر أحبابه شجاع وفارق أحبابه شجاع

[ابو تركي]

من بغى الفرقا لقى له عذر واسباب ودليل . .

خل عنك العذر والاسباب دام الحب ضاع . .

كان ودك بالفراق ابشر عسى عمرك طويل . .

لاتردد وانت لك كلمه ولك أمراً مطاع . .

لي عليك انك تبت بكلمةً تشفي الغليل . .

ولك علي اني لأوقف وقفه الرجل الشجاع . .

لاتجاملني مخافه (قال) مدري خوف (قيل) ..

عمر هرج الناس مايسمن ولايغني جياع ..

كان قصدك سر حبك اوعدك لأصبح بخيل ..

واحمل أسرارك معي للموت قدر المستطاع ..

بس قلها قل ماحبك وأبشر بصبرً جميل ..

لاتحسبني مثل من طبعهم لوي الذراع ..

صاحبك ماهو كذا ياصاحب القد النحيل ..

صاحبك طبعه غريب وغربته غربه طباع ..

فالهوى مايقبل الحل الوسط ولا القليل ..

مثل ماهو لاشرى يشري وليا من باع باع ..

ثابت لو هي تميل الارض حدره مايميل ..

يدري أن الفقر ماهو عيب والدنيا متاع ..

ماعشق لذة حياته كثر عشق المستحيل ..

ولاكرة حتى مماته كثر كره الانصياع ..

كم تعلم من شديد البدو وش معنى الرحيل ..

وكم تعلم من غروب الشمس وش معنى الوداع ..

وكم تعلم من سحاب الصيف وش معنى الحصيل ..

وكم تعلم من ليال البرد وش معنى الضياع ..

ايه انا هذا طريقي (موحش . وصعب . وطويل) ..

وانت لامنك تعبت بعالم فجوجه وساع ..

اعتبرني في بداية سكتك عابر سبيل ..

ورح وانا قلبي معك من وين وجهت الشراع ..

يكفي اني لاذكرت في سالفه عشاق قيل ..

عاشروا أحبابه شجاع وفارق أحبابه شجاع

[دموع الورد]

اعتبرني في بداية سكتك عابر سبيل ..

ورح وانا قلبي معك من وين وجهت الشراع ..
دمت بهذه الروعه ابوتركي لاعدمناك

[عزوز المدينة]

صاحبك طبعه غريب وغربته غربه طباع ..

فالهوى مايقبل الحل الوسط ولا القليل ..

صح لسانك وفالك التوفيق يارب

[ابو تركي]

مشكورة اختي دموووع الورد على المرور

والشكر موصول لك اخي عزوز المدينة

بارك الله فيكم وتحياتي لكم