من سعودي للملك عبدالله

[مغرم]

رسالة سعودي الى الملك عبدالله ‏

المرسل : جبر الخواطر



سعودي منتف ومفقع عقلة وجيبة

روَح زمان الكرامة يازمان الرخامة

أوجه رسالة للوالد القائد خادم الحرمين الشريفين حفظه الله وأطال في عمره

من واجبات الأبووووه أن الأب يستمع لصرخات أبنه

ويضمه على صدره وإذابة كل آلامه

والملك زي أبوي،، لا أحد يتدخل بين أب وطفله



أبشرك يا خادم الحرمين الأسعار مضبوطة

والمواد الغذائية متوفرة

ما نقصنا بس إلا الخبز يرفعون سعره لاتراهم رفعوة أمس

وخذ عندك بعض الأسعار

قشطة المراعي صارت 4 ريال

حبة المظبي 22 ريال

الكفرات أرتفعت 30 بالميه

الأدوية 25 بالمية

تخيل يا خادم الحرمين



جبن كرافت والمراعي السايل أرتفع

طيب وش نسوي لبزارينا المشكلة يقدرون الكرافت السايل مع الصامولي يعني وش نفطر الطحين زاد والبيض زاد حتى الشابورة

الببسي صار 20.5

والأيجارات أرتفعت

وقسايم المرور زادت

الحمدلله على النعمه أمن وآمان

الله لا يغير علينا

حتى رز أبو كاس أرتفع

لا وأزيدك من الشعر بيت رزمة الكراث والبصل صارت بريالين

شفت شلون حنا بنعمه



بس تكفى كلمة راس..؟؟؟



ما ودك.. تنزل رواتبنا شوي..؟؟؟



عشان.. نبني للأردن 70 ألف وحده سكنيه ثانيه!!!

ونعطي لبنان مليار ونص دولار!!!

ونرسل لمصر المعونه السنويه!!!



ولايهون أهل المغرب اللي بعض المناطق الكهرب ببلاش !!

عشان الصيد يطلع لة طعم !!! أجل غزلان ببلاش !!



وحنا ضبان وجرابيع وواجد علينا ناحسونا فيها...

لا وصار فترة صيد يامال الفقر !!!

ونرسل أعانة لساوث كالوراينا ونبني لهم مرة ثانية مثل أرامكو السعودية في نيوأورلينز!!



اللي مازادت موظفينها شئ بس ترسل عيال الأجانب



يدرسون ويتعالجون في أحسن الجامعات والمستشفيات وتتبرع لأمريكا بأكثر من مليارين غير بناء 2500 وحدة سكنية للمساكين وحنا أة من الحنا تراة غلا بعد يخلف اللة علينا ننتظر اللة لايقول زلزال يمكن الجماعة يعطفون ويعطون فلل زي رعاة البقر

وياقلب لاتحزن !!!

تعرف ماشاء الله حنا..؟؟؟

من كثر الفلل التمليك..؟؟؟

الناس صارو يأجرون ببلاش

ممكن طلب طال عمرك.. أبي سلف 12000 ريال لأخر العطلة نبغى الفقع مبطين عن الفقع !!!



يافقعي فقعاة؟؟؟

عندي دين أسدد فيه لي سنه ولا خلص.. كل شهر 500 ريال

الله يرحم حالنا والله..

أبشرك طال عمرك

قبل كم يوم حطم سعر برميل البترول الرقم القياسي وصار يباع بـ 99 دولار

ورصيدي أيضا حطم الرقم القياسي في نفس اليوم وصار فيه 17 ريال

الحمد لله شفت كيف أنا بخير وشعبك بخير



اللة يرحم زايد والعمر زايل اللي قال عز شعبك يعزك وربعنا ذل شعبك يمشي وراك بس ربك فوق ويمهل ولايهمل

ياحسابات سويسرا وصفقات الطايرات الخربانة والمشاريع الوهمية

أحب أطمنك صرنا نسوي رجيم غصب عنا

تعرف اللحم ما عاد نعرفه عقب ماذبحنا الكرم ألحين الواحد معاد عندة عشان يعزم

حتى الدجاج ما عاد نأكله

صرنا رشيقين

تسمع بالكرش ما عاد نشوفها

تسمع بالبطن اللي لاصق في الظهر

يوووووه في كل مكان نشوفه

نم قرير العين الشعب بخير

لاتتعب نفسيا وتدور في النت توأم تفصلهم

توائمنا ليش ينفصلووون

صلة الرحم زينه

خلهم يتشابكون طول العمر

يمكن لو فصلناهم يتهاوشون ويفترقون

خلهم متشابكين في جسد واحد

الله لا يغير علينا

أبشرك طال عمرك شعبك تطور

أستبدل البكاء بطعم الملح؟؟؟

ببكاء بطعم الدم؟؟؟

آآآآآآآآآآآآآآه يا حلو مذاقه

ودك تجربه؟؟؟



أنا أقولك وشلون؟؟؟

نظف منزلك من حليب الأطفال!!!

والبامبرز عشان تطلع الريحة صح وتعرف معنى الحياة

نظف جيبك من الفلوس؟؟؟

نم ومخباك فاضي؟؟؟

خل زوجتك تصحيك من النوم قبل الفجر

وتقولك أن طفلك ما عنده حليب

دق الشماغ ولف على جيرانك

دور سلف.. علشان تشتري حليب لطفلك

الجميع بيطردك لأنهم طفارى كلهم

أنس أنك ملك وأرجع للبيت

بتدخل على أنغام بكاء طفلك

عندها ستحتقر نفسك وأنت عاجز عن أشباع طفلك

عندها ستلعن اليوم اللي أنولدت فيه

عندها ستلعن اليوم اللي أنولد طفلك وصرت مسؤول عنه؟؟؟



عندها ستضمه وستبكي من القهر

ستنزل دموعك وتحس بطعم الدم في حلقك



وتستغفر ربك لأن الجوع كافر والطفرة طق أصبع وهبال على خبال والنتايج قريبة !!!

سوف يكثر الفساد والطمع والسرقة في عز النهار والقتل والقوي ياكل الضعيف

تذكر طال عمرك يوم حنا صغار وش كانو يقولون لنا

كانو يقولون الرجال ما يبكي

عيب تطلع دموعه

صرنا نصيح عادي

البكاء صار ملازم لنا

والسبب كومة لحم (أطفال ونساء) في رقبة الواحد

يبكي لأنه عاجز عن توفير الحياة الكريمة لهم

بس ودي أقولك شي قبل ما أروح وأصيح

تدري وش معنى الرجل يبكي قدام زوجته وأطفاله

معناها تساقط كل قيم الرجولة والوطنية اللي تعلمناها في طفولتنا

معناها إحساس المرأة بالأنكسار وعدم الأمان

معناها خنوووووع ما بعده خنووووع للظروف القاسية اللي وضعنا فيها

معناها أمور كثيرة ما راح تفهمها..

أرسلها لكل من تعرف عسى أن يصل صوت المعاناه الى مليكنا

فيعرف مدى سعادتنا وفخرنا بوطنيتنا
ــــــــــــــــــــــــــــــــــــــــــــــــــ ــــــــ
الصراحه كلام قووووووووووووووووي

منقوول للآمانه



http://a2a.cc/vb/showthread.php?t=56624 (http://a2a.cc/vb/showthread.php?t=56624)

[كاكا]

ابو متعب الله يحفظه للامه الاسلاميه والعربيه

حماك الله يامليكنااا

[كحيلان العز]

الله يخلي لنا ابو متعب

يعطيك العافيه

[مغرم]

الله يعافيك يالغالي ولكن اكرر طلب صاحب الرسالة بأن يكون الرد تعليقا على ما جاء فيها وليس رد عليها او علي مع خالص تحياتي للجميع ،،،،،،،،،

[كن مثلي]

لاحول ولا قوة الابك ياااااااارب

الدعي ربك يفرجهااااااااا مالك غيره

[انسان هادئ]

لا حول ولا قوة الا بالله
ابو متعب ما يقصر مع الجميع
ولكن المشكله ما تاصله مثل ما تتوقعون انتو
اللي تحته اهم اللي يتجاهلون الوضع
ربي يحفظك يا ابو متعب ويطول لنا في عمرك

[ابو طارق]

الله يحفظ ابو متعب والله ماقصر

مافيه مشكله الاحلها او حاول يخففها على شعبه

والارتفاع بالاسعار دعمه اكثر من مرة حتى ينزل للمستواة السابق ورفع الرواتب

بس المشكلة ان ابو متعب الله يحفظه ما كل مشاكل الشعب الموجودة تاصلة

الله يعينه ويقويه على خدمه الوطن والمواطنين والامه الاسلاميه

والف شكر لك مغرم على الموضوع


الله يقويك

[عزوز المدينة]

هههههههههههههههههههههههههههههههههههههههههههههههههه هههههه
يعطيك العافيه ياصاحب الموضوع وصاحب الرساله
وربي ماقال شي غلط الا عندنا ناس ذبحهم الجوووع
وعندنا ناس فقراء ليه الفلوس الي يوديه برى مايعطينا
ايها او يوظف فيها ليه مالنا حق الا المواطن السعودي رايح
فيها بصراحه او ما اشتغلن الحريم خدمات او الحرمه الي تغسل سيارات
مين يرضها
يارب تدوووم علينا الامن والامان يارب
تقبلووو مروري
اخوكم عزوز

[العيون الساهرة]

اي والله اننا ابتلشنا الاسعار من جهه وزاد الطينة بله الحرامية اصحاب المحلات من جهه ثانيه
الاجانب كلونا الرواتب تطلع رغم عن خشومنا من جيوبنا لجيوبهم يعني تكرف بشغلك وراتبك لجيوب الاجانب

والله زمان لما نشري شيء من السوق نفرح ونستانس على اللقمة و الهدمة الحين ترجع من السوق
مقهور وزين ما نصيح وحنا نقلب بمحافظنا وهي فاضيه وين 500 تشتري كل شيء وترجع معك باقي الحين لا
تطلع ب500 يالله صندوق كوسه وبطاط الا وانت مفلس...:mad::mad:

حسبي الله على كل من دخل بجيبه ربح فوق المشروع له وان شاء الله يصرفه على صحته وعياله ايه خلوني ادعي
من القهر يعني مو كفايه بضاعه تقليد لا و صار لها كم سنه ويبيعونها بنفس سعرها وهي جديده

حسبي الله عليهم والله ينتقم منهم


:(:(:(:(