انا ...وجدي ... والأنوثة والدلع

انا ...وجدي ... والأنوثة والدلع

بسم الله الرحمن الرحيم

السلام عليكم ورحمة الله وبركاته


سأروى لكم هذه الحكاية وان شاء الله تعجبكم , صلوا على المصطفى عليه الصلاة والسلام :
يحكى يا شباب ويا بنيات وليس في سالف العصر والأوان بل في عصرنا هذا وتحديداً في خريف عام 1430هـ إني انا ( السنافي) وأسمي : ( طريخم بن شاحي بن ذويخ بن عصيلان بن خريط بن منخرع الذويب ) كنت في البر برقفة جدي : ذويخ بن عصيلان بن خريط بن منخرع الذويب عند الحلال ولا تعتقدون إن الحلال هذا سيارات أخر موديل أو محل ملابس رجالية تبيع بدل ( السموكنق ) أو ملابس نسائية يبيع ( فساتين سهرة ) لكن الحلال هو قطعان من الأبل ( سفن الصحراء ) من نوع ( المجاهيم - الوضح ) ونتمشى أن وجدي : ( ذويخ ) مرة ننزل وأدي ومرة نطلع مرتفع لأن من يقودنا هو الحلال فحيثما يجد عشب يتجه اليه وفي أحد هاكالشعبان جلس جدي وقال : يا ولدي يا طريخم نبغى نستريح ونتقهوى وكان الوقت حوالي الساعة الثامنة صباحاً قلت : أبشر يا جدي ( عاد تعرفون أخوكم السنافي اللي هو طريخم ( نشمي ويحب علوم الرجال وشقردي ) والله وأقوم في الشعيب وأكسر من حطب ( الأرطى ) اللي يحبه قلوبكم وأجيب الحطب عند جدي وأشب النار وأضع دلة ( التفويح ) فوق ( المركاب ) على النار أنتظر حتى الماء يغلي , في هذه الأثناء أبتدأ جدي بسرد قصصة في البر ومغامراته وحروبه وكيف أنه من خلال مرجلته وحروبه كانت النساء في ذلك الوقت ينظرن له على أنه ( فتى الأحلام ) أو ( الدنجوان : ذويخ ) حتى شاءت الأقدار وتزوج بجدتي : ميثاء بنت هديرس بن حصني بن طرطوخ الثعلبي .
قلت : طيب يا جدي ذويخ يا ليت تعلمني وشلون تزوجت جدتي ميثاء ؟
قال جدي ذويخ : والله يا ولدي جدتك ميثاء ( الله يرحمها ) كانت من أجمل نساء زمانها ومن أرجحهن عقلاً نشمية تحب الخير ولا ترضى بالخطأ أبد أبد .
وهنا بدأ الماء يغلي , قلت : أصبر يا جدي خلني أصلح القهوة , والله وأقوم أخذ هاكالدلة البغدادية الصفراء واحط فيها القهوة الهررية المحموسة على جمر السمر وأصب عليها الماء الحار وأحطها على الجمر حتى بدأت القهوة بالغليان وأبعدها عن النار وأحط عليها من هاكالهيل اللي تشم ريحتة من مسافة 10 كيلو متر ( أمزح تراني ما هي 10 كيلومتر ) هي 3 كيلو متر وأحط عليها من هكالزعفران الإيراني وأقرب الدلة حول الجمر وأخليها حتى تقلب القهوة مرة واحدة , والله وأقوم أقرب ( القدوع ) يعني التمر علشان عيال ( السيريلاك ) اللي ما فهموا وش معنى ( قدوع ) وأقربه لجدي وأخذ فنجال وأصب له من القهوة اللي يوم نزلت في الفنجال كأنها خيوط من ذهب وريحتها تصك في الراس وتخليك تصحصح لو أن لك أسبوع ما شفت النوم .
تناول جدي فنجال القوة وارتشف أول رشفة وقال : تسلم يمينك يا ولدي يا طريخم هذي والله القهوة الطيبة ما هي والله قهوة بعض بنات هاليوم اللي إذا سوت القهوة ما تدري هي قهوة أو ( غسيل ملابس ) .
قلت ما عليك زود يا جدي انا ما تعلمت تصليح القهوة الا منك الله يطول عمرك , لكن أبغاك تكملي يا جدي سالفة زواجك من جدتي / ميثاء .
قال جدي : وش أقولك يا ولدي يا طريخم كانت جدتك مثل ما قلت لك مثال الجمال والرقة والأنوثة في عصرها يستحي ( الخزامى والنفل ) من نعومتها ورقتها ( لكن بدون دلع ) لكنها في نفس الوقت تعطي لمن يراها مثالاً حياً للعز والشرف والعقل والعفة والدين , قال ذلك جدي وهو يمد يده بالفنجال فتناولته منه وصبيت له فنجال أخر .
قلت يا جدي طيب أبغى أقاطعك يا جدي : طيب بنات هاليوم ما فيهن أنوثة ولا دلع ؟
قال جدي : فيهن يا ولدي الشرف والعز والعفة .
قلت : يا جدي انا أسألك ما فيهن أنوثه ودلع
قال جدي : الله أعلم , طيب يا جدي وش الفرق بين الأنوثة والدلع .
قال جدي : إذا تزوجت يا طريخم تعرف الفرق بين الدلع والأنوثة .
قلت : طيب والله لأكتب هالموضوع في منتديات دومة الجندل وأسأل الأعضاء والعضوات : وش الفرق بين الدلع والأنوثة .
انتهينا من قهوتنا أنا وجدي وضفينا إغراضنا وابتداءنا رحلتنا المعهودة وراء الحلال .

دمتوا سالمين أخوكم / د . السنافي ( طريخم بن شاحي بن ذويخ ن عصيلان بن خريط بن منخرع الذويب )

المصدر: منتديات دومة الجندل

---

hkh >>>,[]d >>> ,hgHk,em ,hg]gu