هيه ياصحرا




الوجوه تغيّرت
والناس تكبر ..
والقلوب اللّي قبل كانت حنونه
صارت الغـدر وطعونه !!
السما حمرا وطيور الحب ماتت
واشتعل ( دوح ) الوفا
نار وحريق ..
وين يصدح عندليـبه ؟!
كلّ جرحٍ تجرحه لمسة طبيبه !
كلّ قلبٍ تطعنه يمنـا حبيبه !!
والقريب يشوف موته من قريبه !!!
.

.

ياصديقٍ مابقى
غيره صديق ..
واقفٍ لي بالطريق ..
ينكسر من دون كسري
ينثني من دون ربعي ..
إن كتبني سال دمعه
وان كتبته جفّ دمعي ..!
ليتني ماكنت شاعر ..
واكتشفت ان الحروف
اصدق من اوهام المشاعر ..!
.
.

من مدينه
يسكنون الناس فيها
هاجرت روحي
طريد ووجه شاحب ..
وبدفاتر
ينـتـثر شعري عليها
طابت جروحي
سكنت وصرت صاحب ..
ماسمعت اللّي نصحني
" لاتهاجـر " !!
ماسمعت اللّي جرحني
" لاتهاجـر " !!
بعت عمـرْ .. سنين عمـره
علّقوها الناس في سوق
المدينه والمتاجر ..
وقلت اهاجر !!
بعت عمران المدينه ..
الشوارع
والميادين الحزينه ..
والنهار اللّي بكت فيه الفضيله
والظلام اللّي ضحك به
ألف فاجر ..!!
باتحمل كلّ صيحات الحناجر !!
واتحمّل كلّ طعنات الخناجر !!
بس .. اهـاجر !!
.
.

لعنبوها هالمدينه ..
فرّقت بين الحبايب
والنسايب
والقرايب ..
علّمتنا كيف نكره
كيف نكفر ..
نسرق اللقمه من عيون
اليتامى !!
ونتعامى !!
علّمتنا كيف نخسر
كل ( طـيّب ) وبجداره !!
كيف نفرح بالخساره !!
بس ابد ما علّمتنا
كيف نرقى
ونتسامى ..
كيف نقسم لقمة العيش البسيطه
بين جار
وبين جاره !!!
.
.


وين جرّات الربابه ؟؟
وين ( رجمٍ ) صدّعه صوت الذيابه ؟؟
صيحة ( الهاون ) تشقّ الليل
وصهيل الخيل
ودلة هيل
ومشاكيل القرابه **!!؟
يوم كانت عامره بيض النوايا
كانت الدنيا..
سحـابه !!
هيه ياصحرا ..
على سكانك الاف السلام ..
عاصروا برد وسموم
وواجهوا عصف المنايا
لكن ابداً ماتخلوا
عن طباع ( الطيب ) في حرب وسلام ..
علمهم فوق أي علم
وحلمهم فوق أي حلم
وجهلنا فوق أي جهل
وغيظنا ما يفتح ابوابه لسلم !!
.
.

يا صاحبي ..
ما في الرجاوي خير
بعض الرجاوي هم
وقت ( الرجاجيل ) انتهى
وهالحين وقت ( الغمّ ) ..
لاتقول لي بالهون
اصبر ولاتهتم ..
لـو للضمير عيـون
سـالـت
دموعـه
دم !!!