عسى المطر يسقي دروب المحبين
أهل النفوس الطاهـرات العفيفـه
أهل الهوى والعشق مثل المساكين
مايملكـون إلا القلـوب الرهيفـه
يقضون ليل الشوق مثل المجانيـن
وكلٍ يلاقـي فـي خيالـه وليفـه
وأنا وقعت بحب مكحولة العيـن
وأصبحت شاعر لجل عين الشريفه
توي صغير وتوها بـأول الزيـن
وتو الهوى ماعشت برده وصيفـه
قضيت أنا وياه بالحـب عاميـن
نمشي على الدنيا بكيفـي وكيفـه
لكن فرحنا للعواذل خبـر شيـن
وقلوبهـم ماهـي علينـا نظيفـه
ومن بعد ماكنا على اللطف واللين
صار الجفا من عند ذيك اللطيفـه
واللي سعى بالهجر مابين الاثنيـن
قلبه مريض وكود نفسه ضعيفـه
راحت ولا له في حياتي عناويـن
عنوانه الذكرى وسلـواي طيفـه
ياللي تلـوم اللـي نـده للمقفيـن
قلبك حجر وإن شفت عينك كفيفـه
واللي نشدني ياولد تشتغـل ويـن
كنّه قطع معـلاق قلبـي بسيفـه
جاوبت أنا عاطل ومغرقني الدين
والوقت يخدعني بكذبـه وزيفـه
ضيّعت أنا بالجامعه خمسة سنيـن
واليوم حب صويحبي لي وظيفـه

اسعد الله قلوبكم وامتعها بالخير دوماً

أسعدني كثيرا مروركم وتعطيركم هذه الصفحه

وردكم المفعم بالحب والعطاء

دمتم بخيروعافيه