لو كنت اظن ان القصايد تعبر
عن كثر حبي لك سنينٍ مديده
لاخلي العالم وشغلي وادبر
عذرٍ من اهلي وانقلب لك قصيده

::::::::::::::::::::::::::::::::::::::::

كل شعرٍ في حياتك ياحياتي تحفظينه
لو كتب لك مايعبر عن غلاك اللي ببالي

لانك اكبر من كلام الشعر واللي كاتبينه
لانك اعظم من كلامٍ يكتبه غالي لغالي

لانك ارقى من غرامٍ كلهم متعودينه
لانك اصدق من شعورٍ اصدقه كذب وخيالي

لانك اجمل من جماله لانك اعذب ياسمينه
لانك انتي ياحياتي من صفيتله وصفالي

ياحياة القلب مدري ياغذاه واوكسجينه
ياشعاع الشمس مدري ياذراي وياظلالي

والله انك لامشيتي كل غصن تحركينه
ينحني لك احترام واعتزاز وابتهالي

والله انك لابتسمتي تبتسم كل المدينه
معك حتى الكون يصبح رايقٍ باله وسالي

فيك اكثر من جمال الوصف واوصافٍ حسينه
فيك اهدى من سكون الليل واسرار الليالي

شاعرك لوك مكانه والله انك تعذرينه
لو عجزت اني اعبر عن غلاك اللي ببالي

لانك اكبر من كلامٍ عادي ومتعودينه
بتعرفين للي احسه لو تحبينك بدالي